الله في

عليكم الله دي حالة دي ..

من الجوع ناس بموتو ..

ومصيرو الظالم الجوعهم يلاقي ربنا ..

الله في يا أخوانا ..

يا الما عندكم حق العشاء ..

الله في ..

يا الما عندكم حق المواصلات لبكرة ..

الله في ..

يا المظلومين وظالمنكم العسكر ..

الله في ..

بس ..

دعواتكم بالليل وفي الثلث الأخير ربنا يزعزع عرش الظلمة وقماع الحق ..

والله في ..

دقيقة وعدت

نفس طالع .. نفس قايم .. نفس حايم ..
يا حليلن أمات زمان .. بكلمة يطيبن خاطرك .. وبكلمة يودنك درب الراحة ..
هسي الواحدة آخر هندسة ,, إشي سيدات أعمال .. وإشي انا ولدي بقرا في الروضة الخاصة بتاعت اللغات ديك يا فلانة ,, ما غالية .. 5 مليون بس في السنة .. وإشي ورجغك ورجغك والتلفزيون مسمار الحي .. عفواً .. الحلة ..
ونفس طالع .. ونفس قايم .. ونفس حايم ..
وحليلك لحدي ما تتحلى ..
ما هو بتاع الحركة ما سخيف في نظر نفسو .. لانو كان ما قطعك الايصال دة ما بنستر في العيد .. ما الفوقو مستورين ومالم بيهو ..
وأنا مالي مالي مالي والهوى وأنا مالي مالي مالي تحت الصفر 
طيب لشنو ؟!!!
ما المسألة دي ما فرض نفس عنوة كدة يعني ..
خد بالك م الكلام ..
دة الكلام إسم .. بكسر الهميزة وفتح السين وأصل الهمزة قاف ..
أعرب ؟!
نفس طالع .. نفس قايم .. نفس حايم ..
ما القصد والمقصد والمقاصد اللوم
اللوم بجيب النوم 
والنوم بحل الهموم
اذن الهموم بتجيب اللوم
في شنو ؟!

زهجتنا وكرهتنا زاتو 
الواحد ما يكتب عربيتين بالكلمة 
إهيئ هئ هئ هئهئ
غلطتك تاني
اتحداك
طيب ارجع سطرين لفوق
بالجد هأتضارب معاك
معقولة تخليني اكتب كدة
عفواً
كلمتين بالعربي

عــــــــــودة لمستأنف القضية ..
أها ناس خليل إبراهيم عملو شنو ؟
ولا حاجة
حاولو يثبتو انو اي منطقة محكمة في العالم ذات ثغرة
وبعداك 
اتلمينا شلة شباب
وتعال لشباب الزمن دة
زمن جميل
زمن الولد شايل المنديل
وهاك يا سوسو
دي هدية عيد ميلاد بسيطة
ياااااخ ما ترجل
دة الفضل
سوسو عاملة عيد ميلاد وعازمة البنين والبنات وآخر ركلسة وعدم موضوع
طيب البحصل في جامعة السودان وجامعة الخرطوم وجامعة النيلين وغيرها من الجامعات الخرجت عباقرة
البحصل انو الجامعة بقت غرزة مفتوحة لليسوى والما بسوى
يعني حاجة تجنن
شافع صغير ممكن يلقى المانجو 96 قدامو
( الرقيب يظل هنا وهناك يراقب الكلمات علها تخلق ما لا يحب وجوده )
وأتزمت معلناً توبتي عن رجم ذاتي بالخيانة لذاتي
وما علينا
توووووووووشك
الحاصل شنو
الليلة ناس البيت مسافرين ..
طيب القضية دي ما منطقية
اللمة عندنا
ودي منطقية اكتر
اها الزاد على منو
كلم الشباب

وأخوووووكم جا على فهم الزاد دة جداد وبيتزا
اصلو بحترمم جداً
وهم عارفين كدة
وبحرم نفسي منهم بالذات علشان استمتع بالشوق اليهم ولما انفرد بيهم
قووووووون وكاس السودان وكاس الممتاز والمحمولة جواً
رفعت رأس السودان يا مريخ
المهم
ما اخدنا السيك التالث على التوالي
ومن مين
تلميذك يسيكك

طيب دي ما النكهة ذاتا
المهم اتلمو 
كانو جوغة من البراغمة النهشمندية
كرررررو كرررررو كرررررو
كل دقيقتين وش جديد

اللافت للانتباه انو الجميع كانو على الارجح ذوي الدخول اليومية الثابتة
يعني معظمهم طلبة جامعات بصرفو عليهم اهلم
وعطالة بصرفو عليهم اهلم برضو
ملاحظين اهلم دي ناقصة هاء التجميع السوداني جياد تين فاييف سيجنال هيييييي يكة كة كة كة 
المهم معظمهم لا بأس عليهم
أشعلهــــــــــــــا

علي الطناش بووووش كان شم خبر .. يغطس حجركم
معقولة دي على عينك يا مواطن
واشتعلت وزغللت الرؤوس بفعل اللاكؤوس
عاين يا رقيب التحايل دة عشان خاتر سواد إينيك
مآآآآآآك مألللللللم بكسر اللاءات الكتيرة دي

بالمناسبة انا بخرمج في شنو ؟؟
والموضوع دة اصلاً مكتوب لشنو ؟

أيواااااا

ياااااااه نسيت المفتاح جوة العربية أعمل شنو ؟
وأوعا تقولو أكسر القزاز
ملحوظة لا بد أن لا تقرأها:
* ما عندي عربية علشان انسى المفتاح جواها

طيب المفتاح الناسيهو شنو ؟
الله يرضى علينا وعليكم .. نعمة العقل دي ما سهلة .. الواحد يخسر ليهو تلاثة دقايق كل أسبوع بس يفكر .. الحوالينا دة منطقو شنو ؟؟

وهل العرف أصبح أمر عادي ؟
وهل البحصل كل يوم من شباب متوجهين لعالم المخدرات دة عندو معنى ؟
وهل معاناة الشاب الخريج بأنو ما يلقى عمل بسهولة وأنو في الأساس ما يتأهل من الجامعة أصلاً حاجة مقصودة ؟
وهل أنو الوطن أصبح ضميرو بتعلق بكسرة خبز ومال لا بد يتلم ومرة وبيت وعربية ؟
وهل نحن في الأصل عرب مأفرقين أم أفارقة مستعربين ؟
وهل لسة الواحد فينا بحشر عينو في جريدة الزول الجنبو بدون هدف ؟
وهل نحنا الخوووووووف يتجسد فينا كائناً يمشي على ركبتين ؟

سمعتو دي
انا ما سمعتها

عن إذنكم بس أسمعا وأجي